星際啟示錄Interstellar

[注意內含劇透] 星際啟示錄Interstellar係小編最鐘意嘅一套戲之一，除咗因為個故事吸引之外，戲入面當中所應用嘅科學原理亦都係當代電影之中最準確嘅。Interstellar之所以可以有準確嘅科學原理，當中嘅功臣莫過於現今其中一位最有影響力嘅天文物理學家Kip Throne，佢創造咗個背景並交咗比Christopher Nolan擇寫故事，之後拍成電影，而Throne就擔任電影製作嘅顧問。我地今次會講三個係戲入面最重要嘅元素，佢地嘅原理同埋點樣應用係電影裏面。 穿越蟲洞其實冇戲入面咁精彩？ Interstellar故事提及某不知明外星/未來文明(Bulk Being)，係土星創造咗一個蟲洞，而Cooper同其他太空人靠住呢個途徑前往一個新嘅宇宙領域。現實之中，早喺一百年前嘅愛因斯坦就率先利用重力場方程式(Einestin Gravitational Equation)去假設蟲洞嘅可能性，為日後人類對時空旅行嘅故事打好基礎。不過物理學家到而家都未能証明蟲洞存在與否，並且為科學界帶黎咗好多爭議。

Throne根據重力場方程式所形容嘅蟲洞現實上有可能出現嘅形象，為劇組嘅後期製作團隊提供模擬軟件，利用唔同嘅數學條件，例如蟲洞質量同半徑，創造出物理上準確而又顧及美學嘅蟲洞。然而Throne亦有提及Interstellar嘅穿越蟲洞嘅場景，畫面上呈現出太空船穿過一個奇怪嘅空間先去到另一邊，原來現實中如果我地要穿過蟲洞係一個非常沉悶嘅過程，所以劇組決定增添戲戲劇元素，成為戲內唯一唔符合物理現象嘅場景。

黑板上面嘅公式係真係啱嘅？ 故事入面NASA嘅物理學家Murphy一直都研究點樣利用改變地球重力嘅方法，令大型太空站離開地球，係佢嘅office入面嘅黑板上面寫底咗好多算式，去嘗試破解重力嘅祕密。原來啲算式並唔係老吹，而係Throne根據重力場方程式而得出嘅結果。

故事入面亦都提及黑板上面有嘅方程式並唔足供令佢地達成目的，因為另有一半嘅答案存在喺黑洞之中。其實就算係現實中嘅物理學家，都相信黑洞裏面嘅奇異點(Singularity)遵守住量子重力(Quantum Gravity)嘅原則，而現實之中我地對量子重力嘅了解非常少，物理學家亦無從入手解決疑難。所以故事借助主角光環嘅力量(考慮到主角入咗黑洞都冇事)，將黑洞裏面嘅資料傳遞比佢個女(NASA嘅科學家)，令佢地可以大規模撤離地球。 拍黑洞拍到寫論文？ 當主角穿過蟲洞抵達新嘅領域嘅時候，佢地前往米勒嘅行星(Miller’s Planet)去探索居住嘅可能性。而然米勒星其實好近黑洞，根據廣義相對論(General Relativity)指出，當你接近高質量嘅物體嘅時候，嗰個物體嘅引力場會造成時間膨脹(Time Dilation)。簡單啲黎講就係你所經歷嘅時間會比其他人慢，唔同質量影響之下，你嘅一分鐘可以係其他人嘅一個星期、一個月、一年、甚至係幾十年。係故事入面米勒星上嘅一個鐘就等同於地球嘅七年，係其中一個物理上正確嘅一個電影設定。

黑洞係電影入面有好多特寫，然而佢奇怪嘅形狀同我地係其他戲睇到嘅好唔一樣，不過實際上，Interstellar入面嘅黑洞亦都係由Throne特別製成嘅軟件嘅模擬畫面，係百分之百符合物理定律。之所以有一個咁奇怪嘅形狀，都係因為黑洞強大嘅引力場，將彎曲光線前進方向，令黑洞另外一邊嘅吸積盤(Accrection Disk)所䆁出嘅光線，圍繞過黑洞並抵達黑洞嘅前方。呢一個模擬軟件幫助咗2019年黑洞觀測嘅團隊，提供參考嘅數值；最後更加賦予靈感研究人員，令兩篇關於模擬軟件中嘅黑洞嘅論文得以出版。

科學角度嘅影評 Interstellar嘅故事當然吸引人，一個星際探險背景嘅電影講述主角二人嘅父女情，巧妙借助物理現象為故事提供轉折，實屬難得。而且電影對於人類未來嘅方向持樂觀態度，認為人類係探險者，離開地球係必然嘅事實。最令小編開心嘅係電影對於科學嘅嚴謹程度係電影界中前所未見，所提及嘅理論都係有根有據，係一個對愛因斯坦嘅重力場方程式同相對論致敬嘅電影，同時未世設定亦警惕人類應該更加愛護地球，昇華咗電影嘅中心思想。