吹出黎嘅氣有熱有凍？

冬天嘅時候好多人都鐘意擘大口呼暖氣去自己隻手掌度，等自己隻手冇咁凍；不過同時又有好多人會因為食物太熱，又會半合埋自己個嘴呼啲凍空氣吹凍啲食物，不過你又有冇諗過點解同樣係你吹出黎嘅空氣，可以有熱有凍？

氣體其中一種特性係可以隨住唔同因素（能量、體積等）增加減少，氣體嘅壓力都會有所改變，而氣體作為其中一種流體（Fluid），亦都會遵守流體力學嘅定律：

當我地擘大口將空氣吹出黎嘅時候，空氣會由口腔入面以一個圓柱體形狀經過嘴唇，抵達你個手掌。而你合上個嘴唇，其實就係將圓柱體其中一部分嘅收窄，令嗰一部分嘅體積減少，形成一個漏斗嘅形狀。而口腔入面空氣全部都向住外面移動嘅時候，如果過程之中流量（每秒流過嘅體積）保持不變，咁位於嘴唇嘅空氣嘅速度就會高過口腔內空氣嘅速度，我地稱呢個現在為文氏效應（Venturi effect）。

如果唔明嘅，可以幻想下紅磡隧道外塞車嘅成因：六線變兩線，雖然隧道外面嘅線道多過隧道入面，但係其隧道外面嘅車輛流量同隧道入面其實係一樣，咁係因為隧道入面嘅車行得快過隧道外面，所以會有馬路大細唔同但係流量一樣嘅情況出現，而且你亦都會發現入咗隧道之後車輛唔單止快啲，亦都會疏啲。

其實呼出黎嘅空氣亦都一樣，經過收窄嘅部份就會增加速度之外，氣壓亦都會下降，速度越快氣壓就越低，物理上稱為白努利原理（Bernoulli's principle）。當嘴出黎嘅空氣氣壓比外面低，外面較凍嘅大氣就會流向黎自身體嘅暖氣，流動緊嘅冷暖空氣混合，接觸手掌就會令我地覺得凍。

當然，你擘大口呼啲暖氣出黎，你手掌亦都會覺得暖啲，就係因為暖氣離開你口嗰陣時，冇同外面嘅空氣混合，所以會維持做暖氣。

而啱啱講咗咁多，嘅其中一個推論，另外嘅推論包括水分子嘅影響或者空氣體積突然擴張，小編選擇咗嘅推論雖然被最多人認為係最接近現實嘅解答，但係科學好多問題都冇一個絕對嘅答案，只有一個對帶上神秘面紗嘅自然嘅揣測。

文中所提及到嘅知識黎自以下學科：

#流體力學 #熱學

如果想知道更多，不妨搜尋下以下字眼：

#文氏效應Venturieffect #白努利原Bernoullisprinciple