點解可以All Around You You You?

小編去睇戲嘅時候成日都好中意跟住啲歌黎唱：“唔該熄咗個電話啦...”，係咁多個片頭同宣傳之中，小編最鐘意係莫過於“All Around You you you you you”，亦都係Dobly用黎顯示佢地環迴立體聲嘅技術。但係你又有冇諗過點解你可以聽到唔同嘅聲音又可以分辨佢地個方向？

先假設當一組聲音係你嘅右手邊發出，聲音會透過空氣嘅震動傳播，咁嗰組聲音就當然會扺達你嘅右耳先，之後先會到左耳，大腦就會利用呢個時間差，學術上叫Interaural time difference，計算出究竟聲音會係邊一度傳黎。另外，人嘅頭部就會阻擋咗大部份嘅聲音，令另一邊耳聽到嘅聲音大幅減少，形成強度差Interaural Intensity Difference，大腦繼而就可以知道聲音嘅來源方向。

利用聲音嘅強度差同時間差，大腦只可以分辨出左右嘅聲音，咁如果聲音嘅強度時間差都係一樣呢？

當聲音來自正前正上同正下方嘅時候，我地耳廓(Pinna)就發揮佢嘅作用。大家都知道耳仔嘅形狀，無論邊一個方向睇都係不對稱嘅，原來當聲音抵達人嘅耳嘅時候，聲音會依着耳廓嘅形狀反射並進入耳道。唔同嘅方向，自然反射出黎嘅聲音就自然有所不同，大腦從而就方辨出上下前方嘅聲音。

但係，當大腦會發現聲音來自後面嘅時候，一組下意識反應就會展開，大腦控制頭部轉動少少，咁樣聲音就會自然會有強度差同時間差，自然就可以再分辨出方向。當然我地平時都唔會覺得自己會轉頭聽聲，咁係因為人嘅耳仔同大腦都好敏感，只要轉動微量就己經有好大分別。

由聲音嘅左右耳所感受到大細聲、高低頻率嘅分別大腦更加可以辨別出聲音嘅遠近。

返去戲院，唔難發現戲院裏面週圍都放滿喇叭，但係聲音系統就當然唔會止於呢一步啦！利用電腦系統，喇叭可以模疑出聲音嘅唔同來源嘅差别，導致觀眾産生錯覺，令戲院裏面嘅聲音更加逼真。

文中所提及到嘅知識黎自以下學科：

#聲學#解剖學#神經學

如果想知道更多，可以不妨搜尋下以下字眼：

#音源定位SoundLocalization

Reference:

Blauert, J. (1997). Spatial hearing: The psychophysics of human sound localization (Rev. ed.). Cambridge, Mass.: MIT Press.