拋鑊達人是如何鍊成的

小編去大排擋嘅時候成日都見到廚師係爐前面拋鑊，啲炒飯係鑊裏面行雲如水，廚師點樣反來覆去都唔會有飯跌出黎，但係自己反到屋試下拋鑊嘅時候就會整到成地都係飯。小編開始諗究竟拋鑊有啲咩特別技巧，令到廚師可以現實嘅中華一番咁炒飯呢？

正正就係今年嘅二月，來自喬治亞理工學院嘅研究人員，係英國皇家學會發表咗一篇關於炒飯拋鑊嘅文章，利用數學同物理模型去解答小編嘅疑惑。研究團隊首先拍攝廚師拋鑊嘅過程，並且詳細記錄廚師個鑊嘅大細重量，以致食材嘅數同重量。跟住團隊利用軟件分析片段裏面嘅鑊嘅移動路徑，以及米飯嘅移動方向，成功揾出鑊同爐頭相應嘅角度、拋鑊嘅頻率、以及飯嘅移動週期。

研究團隊利用物理定律同數學模型，研究團隊更加發現，無論唔同廚師定唔同份量嘅食材，拋鑊都會維持係大約每秒2.7下嘅頻律，即係每0.33秒就要拋完一次，反覆來回咁樣先會同鑊入面嘅飯同步，唔會浪費爐頭嘅熱力。

除咗移動嘅頻律之外，研究團隊更加發現出廚師拋鑊嘅時候，鑊會前後反覆來回，同時炒鑊會以類似搖搖板咁上下升降，而且前後平移同上下升降嘅兩組動作並唔會同時進行，反以其實其組一種動作會有少量嘅延遲，令廚師可以拋起啲飯，同時保持炒飯係個鑊入面，能夠令飯粒不斷混合同冷卻，並等飯粒變色嘅同時又不會炒燶。

研究團隊亦都比較唔同份量嘅炒飯，發現出經過拋鑊處理，越大份量嘅炒飯會越節省時間，團隊係拍攝炒飯嘅時候要求廚師一次過炒三人份量嘅炒飯，只不過都係用多25%嘅時間，更加節省能源。

研究團隊係文章最後更加表示，今次嘅數學模型令之後研究炒飯機器人，去模仿廚師拋鑊嘅動作，以減輕廚師嘅負擔及降低患上職業病嘅機會，會有好大嘅幫助。

Reference:

Hungtang Ko and David L. Hu 2020 The physics of tossing fried rice. J. R. Soc. Interface.17: 20190622

http://doi.org/10.1098/rsif.2019.0622