玻璃點解係透明？

日常生活之中我地經常遇上同使用含有玻璃嘅物件：窗口，水杯，甚至你手上嘅電話電腦都有玻璃嘅蹤形，基本上係無處不在，但係我地係平時經常咁望住玻璃都冇發現佢嘅存在，全因為玻璃係透明嘅，光遇上玻璃嘅時候都只會穿過，唔會有任何反應。玻璃嘅特性唔單只為我地日常生活帶黎好多方便之處，更加係幫助人類文明發展上佔一席重要位置。不過大家又有冇諗過點解玻璃係透明嘅？

//地下嘅石點變成玻璃？

要明白玻璃嘅構成，首先我地要了解玻璃嘅主要化學成份：二氧化矽（Silicon Dioxide），大多嘅二氧化矽都係會組成規則嘅晶體，亦都係我地所講嘅石英出現係大自然之中，主要係地表上嘅砂礫入面，所以砂亦都係玻璃嘅主要原材料。當加熱砂嘅時候，石英嘅晶體化學結構就會打破，二氧化矽都會開始流動成為液體，會達至一個混亂嘅分子結構，就好似冰變成水一樣。

不過當液態嘅二氧化矽冷卻嘅時候，粒子會依然保持住液態咁樣嘅分子排列，並唔會好似水咁冷卻變成晶體，反而成為所謂嘅非晶體固體，亦都係我地係網上面見到製作玻璃時，橙紅色熔解咗嘅玻璃。繼續冷卻玻璃嘅時候，二氧化矽粒子會填滿表面上嘅空間，令到佢表面光滑無縫，咁樣一黎光線就唔會週圍散射。

//講咗咁耐都冇解釋點解玻璃係透明

想知點解玻璃係透明，首先我哋要了解原子嘅結構。大家都知原子係由原子核（Nucleus）為中心，周圍環繞着電子，如果我哋將原子核變成一粒珍珠咁大，一粒原子就好似一個運動場咁大，而電子就係一粒粒係觀眾席上面嘅米，所以係原子中間實際上係有好多空間比光穿過。咁個問題就轉變成，點解所有物體都唔係透明嘅？

其實每一粒電子都有各自嘅能量程度，就好似運動場嘅觀眾席一行行嘅座位一樣，而每一粒電子就會有一個預定嘅座位。如果電子想去更加高嘅行數，就要吸收光線所帶黎嘅能量，但係光線帶有嘅能量，一定要等如每一行之間嘅能量差別，如果唔係電子就唔會離開自己嘅位。而係玻璃入面嘅二氧化矽，因為每行之間嘅能量差別實在太大，所有嘅可見光都冇足夠嘅能量令電子轉行，令玻璃唔會吸收可見光，所以我地就可以見到玻璃背後嘅物件，亦都係我地所謂嘅透明。

文中所提及到嘅知識黎自以下學科：

#晶體化學#核子物理學#量子力學

如果想知道更多，可以不妨搜尋下以下字眼：

#石英#非晶體固體#玻爾軌道

Reference

Encyclopædia Britannica. (2020). Glass. Retrieved from https://www.britannica.com/technology/glass