天荒地老流連在太空三十年

哈勃太空望遠鏡 (Hubble Space Telescope, HST) 絕對係人類太空史上最重要嘅一個望遠鏡，由1990年開始運作到而家，當中所帶來嘅影響超越天文同科學圈子，係唔少嘅場合都有被人提及過，或者見到佢同佢啲相嘅身形，今日就等大家睇吓呢一個傳奇係點樣誕生。

點解要射望遠鏡上太空？

位於地面嘅望遠鏡經常會受到大氣層嘅干擾，所得出嚟嘅影像會比較模糊不清，而且大氣層會吸收紅外線同紫外光，令地面上面嘅望遠鏡受到限制，所以位於太空軌道上面嘅望遠鏡計劃就開始成形。不過HST計劃亦都唔係一帆風順，當中經歷過唔少嘅挫折，早係1962年太空望遠鏡已經被納入發展太空計劃嘅一部份，然而因為資金嘅減少同埋挑戰者號嘅事故令HST一再延遲升空時間。不過最終係1990年，由NASA以及唔同嘅機構嘅共同合作底下，由發現號太空梭將佢送入軌道。

近視嘅望遠鏡

HST當年的升空之後，就即刻發現到相片嘅質素比計劃中嘅相片模糊同唔清晰，甚至比起一部份嘅地面望遠鏡更加差。本身HST已經造價不菲，估計開銷高達45至60億美元，所以消息一傳出去各界比喻HST為大白象計劃。最後NASA發現原來望遠鏡主鏡嘅形狀有錯，主鏡原先設計係一個球體嘅一瓣，並將光線聚焦係一點，不過主鏡係製造過程當中，邊緣位置比設計嘅弧度平，令影像有散射嘅跡象。

問題發現左之後，天文學家即刻着手係解決方案之中，因為係軌道上面更換備用鏡太貴又太嘥時間，將佢帶返落地面又係一件唔可能嘅事，所以天文學家等柯達去設計一個有相同嘅影像差，但係效果相反嘅光學系統黎抵銷錯誤，定係1993年進行第一個維修任務。簡單啲講，即係望遠鏡第一個維修任務就係幫佢配返一副眼鏡。係解決緊光學系統嘅問題嗰三年，科學家亦都一直利用望遠鏡去觀察星體，雖然有好多天體觀察被取消或者延後，不過天文學家熟練運運用影像處理技術，令觀察技術得以成熟發展。

天文史最大嘅成就之一

HST強大嘅能力令佢幫助天文學家解決唔少問題，對宇宙的擴張速率和年齡有更正確的認知，發現宇宙嘅膨脹係加速緊，而宇宙嘅年齡係137億年。HST更加證實咗星系嘅核心係黑洞形成嘅，對研究星系嘅發展同中心黑洞產生長遠嘅影響。而且HST嘅可見光圖像亦都係首屈一指，30年黎影咗大量經典而又著名嘅影象。

Reference: Hubblesite.org, NASA